مشكلة تطلب حلا  

    الأخ محمد مساعد الصالح المحترم
ممكن توصل مشكلتنا الى المسعولين (عفوا اقصد المسؤولين) في الدولة.. مشكلتي انا متواجد حاليا في الولايات المتحدة الاميركية وصار لي تقريبا شهرين.. لكن كما تعلم أن أسعار برميل النفط تزداد يوما بعد يوم.. ومن يوم ما وصلت ارتفع سعر الغالون اكثر من نص دولار.. وبحسبة بسيطة.. نص دولار في 20 غالونا يعني الفرق صار 10 دولارات (ثلاثة دنانير) كل مرة اترس سيارتي.
في حين انك أنت تترس سيارتك كل مرة 3 دنانير.. يعني الله يرضى اني ادفع فرق السعر خلال شهرين 3 دنانير وانت تدفع 3 دنانير علشان تترس سيارتك؟!
اشتكيت حق مختار المنطقة عندنا السيد جيمس الدفشان (تراه كان عضو جمعية المنطقة سابقا.. بس للأمانة يداوم 24 ساعة باليوم ومهتم بالمنطقة.. لا بعد يعرف يكتب ويقرأ)؟
المهم تعجب مختارنا وقال انت كويتي وتشتكي؟
انت لازم تكون مستانس.. لانه مقابل ارتفاع البنزين في اميركا.. انت بالكويت قاعد تربح باليوم 30 دولارا على كل برميل.. وانتو الكويتيين كلكم مليون وتبيعون 2 مليون برميل.. يعني كل واحد له برميلين باليوم.. وأرباحهم تساوي 60 دولار يوميا لك.
فالرجاء.. انك تبلغ وزير النفط الكويتي (واذا ما عندكم للحين وزير.. بلغ اقرب وزير ساكن عند مجمع مؤسسة البترول) انه يعطينا حسابنا من ارتفاع أسعار النفط.. وكله 60 دولار يوميا او 1800 دولار شهريا.. الرجاء تحويل الفلوس على حسابي الموجود اسفل الرسالة او الاتصال بالأخ ابراهيم دبدوب واعطاؤه الفلوس كاش أمانة على ما ارجع.
او كلش كلش.. اذا المسؤولين ما يرضون.. فأنا ما عندي مانع انك تكلم (مسعول) التسويق العالمي في مؤسسة النفط.. علشان على الاقل يعطي خصم حق البترول اللي يصدرونه حق اميركا.. خاصة اللي يروح الساحل الغربي من اميركا.. ترى عيال الكويت وايد هني.. وتوصيهم يدزون لنا البنزين الزين.. الخالي من الرصاص.. مو المغشوش اللي طلع يخلطونه ماي وتوقف السيارات عندكم بالكويت.